বিজয় পাংগিং

বিশ্বগুৰু’ৰ সপোন বনাম বাস্তৱ - বিজয় পাংগিঙৰ বিশেষ লেখা      ভাৰতবৰ্ষই আজি বিশ্বদৰবাৰত এক মহাশক্তি বা ‘চুপাৰপাৱাৰ’ হিচাপে আত্মপ্ৰকাশ কৰাৰ সপোন দেখিছে। ৫ ট্ৰিলিয়ন ডলাৰৰ অৰ্থনীতিৰ লক্ষ্য বুকুত বান্ধি দেশ দ্ৰুতগতিৰে আগুৱাই যোৱাৰ দাবী কৰিছে। কিন্তু শেহতীয়া কিছুমান ঘটনাই আমাৰ এই ‘বিশ্বগুৰু’ হোৱাৰ উচ্চাকাংক্ষা আৰু প্ৰকৃত বাস্তৱৰ মাজত থকা ব্যৱধানটো স্পষ্টকৈ উদঙাই দিছে। বিশেষকৈ শেহতীয়া খ্ৰীষ্টমাছ উদযাপনৰ সময়ত দেশৰ বিভিন্ন প্ৰান্তত যি অসহিষ্ণুতাৰ পৰিৱেশ দেখা গ’ল, সেয়া কেৱল দুৰ্ভাগ্যজনকেই নহয়, বৰঞ্চ অত্যন্ত উদ্বেগজনক।   কিছুদিন আগতে সমগ্ৰ বিশ্বৰ লগতে ভাৰততো বৰদিনৰ ব্যাপক আয়োজন চলিছিল। কিন্তু এই পবিত্ৰ ক্ষণত বিভিন্ন ঠাইৰ পৰা অহা বাতৰিবোৰে দেশৰ সচেতন নাগৰিকক লজ্জিত কৰি তুলিছে। অসমৰ একাংশ ঠাইত খ্ৰীষ্টমাছ উদযাপনত বাধা প্ৰদান, ইন্দোৰ আৰু ৰায়পুৰত খ্ৰীষ্টমাছৰ সজ্জা লণ্ডভণ্ড কৰা, ফৰিদাবাদত বৰদিনৰ গছ (Christmas Tree) জ্বলাই দিয়া, আনকি লক্ষ্ণৌত আৰক্ষীৰ দ্বাৰা অনুষ্ঠান বন্ধ কৰা বা গীৰ্জাৰ ক্ষতিসাধন কৰাৰ দৰে ঘটনাই সংবাদ শিৰোনাম দখল কৰিছে। আনকি কিছু খ্ৰীষ্টান মিছনাৰী স্কুলত বলপূৰ্ব...